Stampa

Valutazione attuale: 5 / 5

Stella attivaStella attivaStella attivaStella attivaStella attiva
 

24129764 10215070730630637 248495066172731555 n

Se fussi cavaleri di Gran Cruci
a pedi scarz' 'i munti passarrìa,
p'amur' 'i basu chissi mussa duci
carnusi comu cocci' 'i Marvasìa.

Chilometri e chilometri 'i catusi
a maniuni, 'nterra, scavarrìa,
p'amur' 'i viu s'occhji toi curiusi
ca na Ninfa pari tu, gioiuzza mia.

E se 'ndavariss' 'i pass' 'u mari
p'amur' 'i staiu glià vicin' a tia,
na barca d'oru mi farrìa fari
e tutta la me 'rrobba 'mpegnarrìa!

E se di voti friddu ti farrìa
cogghjìa milli rosi 'nte senteri
e una 'ppress' 'a nattra li cusìa
I ti fazzu na vesta chi ti meri!

Se non ti pari troppa fantasia,
mi mentu l'ali e volu fin" e stigli
ca sul' 'a janca Luna potarrìa
I ti faci fermagliu nte capigli!

E non ti dicu attru chi farrìa...
I staiu cu tia sulu na ura
finu 'nto focu vivu trasarrìa
e pa mia sarrissi na friscura!

Ca non nc'è fiamma e mancu focularu
com' 'u cori meu ch'è nu brusciuri
e zziffiglìa senza 'i ncè riparu,
abbasta i ci si tu, me duci amuri!

F.M.
28.11.2017