"O gloriusi Medici ‘i Riaci,
chi curati ogni speci i malatia,
sentiti ‘sta preghiera si vi piaci:
curati se potiti la stortìa!

Morbu ‘i chigliu chi menti sempi guerra;
‘i cu’ simina sempi mpamitati;
‘i cu jetta velenu sup''a terra
e dici: "u fazzu sulu pa umanitati".

Curati, se potiti, ‘a vanteria
i gli perzuni c’oji vi cuntaru:
"st'orazioni viditi ch'esti a mia",
ambeci tutti sannu c''a copiaru.

"Oh figghiu chi volisti mi ndi preghi"
- mi rispundi pa primu San Damianu -
sti cosi ccani è inutili ‘i ndi spieghi:
ca nui sapimu l'omu quant’è stranu.

‘I quandu nuatt’ eramu ‘nto mundu,
sta storia sempi nc’era e ancora dura,
ma si ‘u penzu mi veni ‘i mi cumpundu:
c’ancora non trovamma nuglia cura!

"Curamma tutt’’i speci ‘i patimenti,
San Cosimu, a stu puntu, rispundiu:
“ Pa chista malatia non nci fu nenti,
pacch’i storti n’’e sarba mancu Diu”

Filippo Musitano
26.09.2016